“Təmtəraqlı məzar daşlarının tamamilə ləğvi ilə bağlı qərar verilərsə, bu, mövcud qəbirlərə tətbiq olunmayacaq”.
Bu fikirləri KONKRET.az-a ilahiyyatçı Fazil Əhməd səsləndirib. Qanunvericilikdə qəbul olunan qərarlar yalnız həmin tarixdən sonrakı dövrə şamil edilir.
Onun sözlərinə görə, köhnə məzar daşlarının sökülərək standart nümunələrlə əvəzlənməsi ehtimalı azdır:
“Çünki belə məzar daşlarını qoyanlar arasında çox sayda vəzifəli və imkanlı insanlar var. Ümumiyyətlə, varlı təbəqə buna daha çox meyilli olur” – deyə ilahiyyatçı vurğulayıb.
Fazil Əhməd xristian məzarlıqlarındakı nümunəni misal gətirərək orada bütün məzar daşlarının eyni standartda, sadə və nizamlı şəkildə yerləşdiyini qeyd edib.
O, Bakıdakı qəbiristanlıqların dolduğunu, hətta köhnə qəbirlərin üstündə dəfnlərin aparıldığını bildirib. İlahiyyatçı yeni qəbiristanlıqların şəhər kənarında salınmasını və burada standart məzar daşlarının tətbiqini məqsədəuyğun sayır:
“Şəhərin çıxacağında boş ərazilər var, orada yeni məzarlıqlar salmaq olar. Bu, həm də şəhər daxili tıxacın qarşısını alar. Hazırda hətta rayon sakinləri də vəfat edən yaxınlarını Bakıda dəfn etdirməyə çalışır”.
Fazil Əhməd əlavə edib ki, belə bir qərar qəbul olunsa belə, onun köhnə qəbirlərə şamil ediləcəyi inandırıcı deyil.
